المشاركات
قالت جدتي " كعب الخير " أطال الله في عمرها:
---------------------------------------
- بتسألني ليه يا "واد" عن رأيي في "النايب" اللي بتسموه "أحمد الطنطاوي" وأسميه أنا "أحمد النطنطاوي"؟. ما هو إنت عارف رأيي فيه كويس من زمان. واحد "نطناط" عامل نفسه مناضل وهو "حنجوري" ؛ ونخبتكم "الهبلة" شغالة طبل وزمر ليه!
عارف يا "وله" أحمد "النطناط" ده بيفكرني بمين؛ قوووول؟ بــ " أيمن نفيخة"؛ اللي بتسموه أيمن نور قبل ما يعمل بالريالات إياها عملية التجميل وتنفيخ خدوده بالسيليكون.
"النطنطاوي" ده يا "واد" ماشي على خط " النفيخة " خطوة بخطوة وحرف بحرف؛ وكمان بينسق معاه؛ قل لي إزاي قوووول؟... أقولك أنا:
** "أيمن نفيخة" زمان عمل من نفسه معارض لحسني مبارك؛ فلعب مبارك بيه؛ ووافق عليه منافس له ومعارض بس من نوع " الهوهوة "؛ ولما سقط في الانتخابات مزعلشي؛ المهم له إنه يأخد لقب إنه إترشح لرئاسة مصر!!
** وخللي بالك برضه إن "أحمد النطنطاوي" بيحاول هو كمان يلعب دور المعارض للسيسي من البرلمان؛ وبيجهز نفسه لانتخابات الرئاسة؛ واللي كشف ده كتابات صبيانه والمطبلاتية في " الفيس"، وقالوا إنه الشخص المناسب الجديد لمنصب الرئاسة؛ إشمعنى يعني "نفيخة وصاحبه صباحي"؟!
** لكن خذ عنك ديه؛ "أيمن نفيخة" بتمويل من جماعة إخوان الشياطين من فترة طلع مبادرة سموها له (مبادرة لم الشمل)؛ شمل مين يا "بالونة" إنت عاوز ترجعهم من تاني؟ وكالعادة فشل في الترويج ليها؛ فقام "بلل ورقها وشربها". المهم قبض المعلوم ولسة بيلهف!!
** وآدي "أحمد النطنطاوي" كمان؛ بالتوافق الخفي مع الجماعة إياها طلع مبادرة سموها له (مبادرة الإصلاح)؛ واتبناها "أيمن نفيخة" بسرعة في قناته مع قنوات الشر الثانية وقناة "الخنزيرة"؛ لأنه دايخ في السعي لهدم منجزات الدولة المصرية؛ وبالتأكيد "النطنطاوي" حايفشل؛ وكمان راح "يبلل ورق مبادرته ويشرب مايتها".!
** الحقيقة المستخبية يا "واد" إن "أحمد النطنطاوي" ده وصل دلوقت لمرحلة تجهيز نفسه لإعلان إنه كمان بيحلم بكرسي رياسة مصر بدليل صورته مع العلم المصري؛ وبيشترط من خيابته إن السيسي لابد يسيب الكرسي؛ بدليل إنه بيطالب بإلغاء التعديلات الدستورية اللي وافق عليها أغلبية المصريين؛ قال إيه بيطالب بانتخابات رئاسية جديدة سنة 2022م ولازم إنه لا يترشح لها الرئيس السيسي؛ ومش مكسوف وهو بيقول (حرصا على مستقبل البلد). شفت خيابة أكتر من كده يا "وله"؟!
** لكن يا "واد" خليك واعي وعارف؛ ده إسمه السيسي مش مبارك. ده رئيس مخلص؛ وجابه الجيش العظيم للإنقاذ؛ والشعب المصري واقف في ضهره؛ لأنه الوحيد دلوقت اللي بيعيد بناء مصر بعد ما خلاها مبارك دولة عشوائية مريضة بالفقر؛ والعطالة والبطالة؛ والأمراض والفيروسات.
*****
إسمع خلاصة الكلام يا " وله "؛ قل لنخبتكم الهبلة ديه؛ "نخبة أم حسن الطبالة": إمتى حاتسيبوا الطبلة؛ وتشوفوا لكم كتاب تقرأوه؛ وتنقطونا بسكاتكم؛ "جاتكم القرف"!!
"رأفت السويركي"
ليست هناك تعليقات:
إرسال تعليق