قالت جدتي " كعب الخير " أطال الله في عمرها

قالت جدتي " كعب الخير " أطال الله في عمرها:
---------------------------------------

- عارف يا "واد" أنا باتعجب لما أشوف في التلفزيون صور الميادين العربية مزحومة( جدتي تقصد مزدحمة) ومليانة في توقيت واحد بعيال بذقون وشنبات؛ وكمان بسلاسل وفيونكات؛ ومعاهم بنات قمرات... زي الشربات؛ وقال إيه بيسموهم المحتجين والمحتجات؛ وأقعد أضرب كف بكف يا "واد" واسأل نفسي: هم ليه الحلوين زعلانين؛ إذا كانوا شغالين طبل وزمر ورقص وأغاني من نوع " دلعني يا زغلول"؟

الغريب يا "جدع" ـ (لاحظوا إن جدتي طورت طريقة مخاطبتي) ـ إن الميادين العربية كلها من الشرق للغرب بتزدحم بالعيال دي في توقيت واحد؛ بصورة تفكرني بعرايس الخيوط في " فيديون" {الليلة الكبيرة يا عمي والعالم كتيرة. ماليين الشوادر يابا م الريف والبنادر.؛ وفريرة للعيل... يا أبو العيال ميل... خد لك سبع فرارير... زمارة... شخليلة... عصفورة يا حليلة... طراطير يا واد طراطير؛ ويا غزال يا غزال... ده العشق حلال... دوبتني دوب... خلتني خيال؛ ويأم المطاهر رشي الملح سبع مرات؛ وطار في الهوا شاشي وانت ما تدراشي... يا جدع؛ طرفه شاور لي عليك، حكم الهوا ماشي. ( عرفتم الآن من أين جاءت جدتي بالصفة الجديدة يا جدع التي نادتني بها وهي تعيد تذكر أوبريت الليلة الكبيرة الذي وصفته بأنه " فيديون")!!

وعندما سألتها: يا جدتي ما علاقة هذا الأوبريت بتجمعات الاحتجاج في الميادين العربية؟ دفعتني بيدها في صدري وهي تقول:

ـ ماحدش يا "وله" من " نخبة أم حسن الطبالة" على الفيس بتاعكم سأل نفسه: إزاي بيتجمعوا في كل الميادين بطريقة واحدة؛ وفي مواعيد متقاربة؛ وبيرفعوا شعارات واحدة متكررة؛ يعني يا "واد" هم أشبه بالعرايس اللي بتتحرك بالخيوط؛ وهناك اللي بيدفع للمقاولين المتخصصين من النخبة لتنظيم المظاهرات؛ وبيقولوا في البداية "سلمية سلمية"؛ وبعدين يستفزوا الأمن ويهجموا ويحرقوا؛ فتقوم الشرطة ترد عليهم بـ "كنابل" الدخان؛ تقصد جدتي"قنابل الدخان"!

يا "واد" الناس ممكن تتظاهر مرة أو مرتين أو تلاتة؛ وبعدين تلتفت لأكل عيشها؛ لكن إن يتجمعوا؛ ويناموا في الميادين لأسابع" ويأكلوا ويأرجلوا يبقى لازم هناك سيناريو ومخرج بصوابع بيحرك الخيوط!

إفهم يا "واد" إن اليد اللي بتحرك "المساخيط" في الميادين والشوارع دي هي إيد واحدة؛ ماسكة الخيوط كلها... علشان إيه؟ أيوااااااااااه؛ " أوبريت الشرق الأوسط الجديد". عرفت يا جدع معنى: (أنا شجيع السيما أبو شنب بريمة)... إتبرمت رقبة نخبتكم "الهبلة"!!

                      "رأفت السويركي"