المشاركات
قالت جدتي " كعب الخير " أطال الله في عمرها:
---------------------------------------
- بصراحة يا "واد" كل مرة أشوف فيها نشرة الأخبار في التلفزيون... أفضل أضرب الكف بالكف وأنا "مستغربة" (جدتي تقصد الشعور بالغرابة)، وأقول إيه اللي بيحصل في الدنيا دي؟
تلاقي في كل بلد شوية رجالة وعيال وبنات متجمعين، وبيهتفوا عبارات بيسرقوها من بعضهم، ويقولوها مهما اتغيرت ظروف كل بلد عن التانية. لأ وراح يجيلك واحد من "نخبة أم حسن الطبالة" إياها، ويقعد "يتفلفس" (جدتي تقصد يتفلسف)؛ ويقولك أصل "الديمؤراطية" (جدتي تقصد الديمقراطية)، وأصل حكم العسكر، وأصل حق الشعوب في حكم نفسها؛ والكتير يا "وله" من "الكلام المكلكع" ده (جدتي تقصد الكلام المعقد).
طيب يا "فلفوس" (جدتي تقصد يا فيلسوف) كل "البغبغة" بالكلمات دي (جدتي تقصد صوت الببغاء) موجودة كمان في مظاهرات هونج كونج، وفرنسا وأمريكا. يعني يبقى يا فالح الحال كله من بعضه هنا وهناك.
لكن يا "واد" خللي بالك قوي: إمسك صورة من أي مظاهرة في الدول العربية، والأوروبية والأسيوية وإتأمل فيها؛ راح تلاقي الأشكال الموجوده بتحرك الجمهور كلها شبه بعضها، يا إما تسريحة شعره زي اللي اسمه مايكل جاكسون، أو بيربط " كنفوشه " في جدايل "بفيونكة"؛ أو مطول دقنه ومنومها على بطنه (جدتي تقصد ذقنه) ، أو شعره شايب، وكرشه ناطط قدامه، أو لابس شورت وشبشب، أو واحدة بنت "مهشتكة" مش لاقية راجل يلمها؛ لأنها بتسمي نفسها "سائرة"( جدتي تقصد ثائرة)!
كلهم يا "وله" من "نخبة أم حسن الطبالة" اللي عايزين يلعبوا أي دور. عيال ونسوان عندهم فراغ في وقتهم وادمغتهم؛ وزي ما بيقولوا عنهم: بيقبضوا الدولارات بتاعة الجمعيات المتمولة من "جهازات" المخابرات (جدتي تقصد أجهزة المخابرات) علشان يجمعوا الناس؛ ويغضبوهم في الشوارع. وانت عارف بقى بقية اللي بيحصل.
لكن خللي بالك يا "واد" همه يهيجوا الناس، وياخدوا الدولارات ويهربوا في الشوارع، وبقية المتظاهرين يصرخوا، وياخدوا نصيبهم من دخان "كنابل" الغاز (تقصد قنابل الغاز) ويكحوا ويدمعوا ويروحوا... عرفت بقى سر لعبة "الخيابة" (الخيبة)إياها... لازم الناس تفهم حكايتهم؟!!
"رأفت السويركي"
ليست هناك تعليقات:
إرسال تعليق